#Corse – « Al di la di a spassighjata di J. Follorou in Purtivechju »

18 Mars 2013

Corsica Infurmazione - #Corse - " Al di la di a spassighjata di J. Follorou in Purtivechju "

Pochi ghjorni fà, c’era un dibattitu urganizzatu in Portivecchju in giru à J. Follorou è u so ultimu libru (« La guerre des parrains »). A stampa rughjunali n’ha fattu un intervista induva l’omu da u so parè nant’a cio ch’iddu chjama u sistema maffiosu…
Un hè u primu a parlà d’issu sistema. E ni parla comu u ghjurnalistu francesu ch’iddu hè. A situazioni « maffiosa » in Corsica hé in l’aria di u tempu. Si ni parla dapartuttu, da u carrughju purtivichjacciu à u piu altu niveddu di u Statu francesu … Ma, a dilla franca, un hè una novita : Facini parecchji decini d’anni chi si ni senti parlà. E uni pochi di ghjorni fà, un rispunsevuli naziunalistu l’ha dinunciata una volta di più à u mumentu di u trasferimentu in Parighji di un militenti di a so urganisazzioni chi era statu arristatu da a pulizza francesa.
Ben sicuru a situazioni in Corsica hè gravissima. L’analisa suciitali dimostra bè a crisa murali, culturali, suciali e ecunomica chi impighjurisci. Ma a Corsica un ha u primatu d’issu risicu maffiosu. Asisti dinò in giru a l’isula, in i paesi auropei com’è quiddi di u mari tarraniu. E sarà piu strutturatu chi ind’é noi.
Parchi hè d’attualità, si ni parla e si ni trapparla d’issa mafiosisazzioni corsa… A chi ni faci articuli, a chi ci dà lizzioni, a chi ni faci libri, a chi ni faci filmi… Ma saria piu che bè di andà piu in dà, in u fondu di l’analisa di i cundizioni di u campà oghjincu in Corsica. E di cunoscia a rialtà pulitica di l’isula…
Pa’ contu meiu socu cuscenti d’issu risicu chi rapprisenta supratuttu un certu banditisimu. Una parta d’issu banditisimu prova à attravirsa i spazzii pubblichi pulitichi e ecunomichi e tandu, risichighja d’upponasi a l’intaressi culletivi corsi. Ma ùn si po dinò scartà a rialità di i manipulazioni di u Statu Francesu chi pà cumbatta u Muvimentu Naziunali, ha sempri circatu a manighjà uni pochi di malfattori contr’à i militanti pulitichi corsi .A storia muderna di u naziunalisimu corsu ci moscia issi trappuli murtali. L’attualità c’insegna chi u Statu francesu, di logica di suttumissioni, ùn cambia…
Di fatti hè piu interessanti pà u sistema di parlà in Francia, e ancu in Auropa di di maffosisazioni di a Corsica, chi di prublema puliticu corsu. Hé piu intaressanti, parchì pà u guvernu francesu, fora di i forza ghjudiziaria e pulizziera soluzzioni pulitica pa’ a Corsica, un ci n’hè… Hè piu intaressanti pà u guvernu francesu di scartà u muvimentu naziunali di i so fundamenti urighjinali e di pruvà a lampà lu in a trappula di i puteri affaristi…
Corsica Maffiosa hè !!! E Corsica culunia un hè ? Sariani i corsi soli rispunsevuli di i derivi suciitali ? Chi ingannu !!!
L’avviu dighjà scritta in una riflissioni parsunali dui anni fà. Credu chi hè sempri valevuli :« chi ognunu tinissi à menti chi u Statu Francesu in Corsica ùn ha vucazioni à tumbassi da par iddu. Chi ugnunu tinissi à menti chi u rolu di u Muvimentu di Libarazzioni Naziunali hé di metta in simbiosi pà vincia, tutti i forzi chi si riconoscini in u so cuncettu. Incù a cultura pulitica ch’idda supponi. Incù dinò un sguardu chjaru annant’àl’avenimenti tristi chi l’hani toccu. Chi ugnunu un pirdissi di vista l’essenziali : U culunialisimu francesu».
Un aghju micca da abbaghjà incù quiddi chi aspettani da a ghjustizia francesa rispettu di u drittu e di a vita. A storia c’impara chi a Francia ùn ha primura di noi…
Un aghju da abbaghjà incù quiddi chi provani à spiegacci chi noi soli semu rispunsevuli d’issa situazioni. Un soccu adettu di l’auto flagellazzioni…
Un voddu cascà in issa visioni limitata di risicu maffiosu parchì a pulitica di sttumissioni secularia francesa s’hè appughjata nant’a i manipulazioni di i clani contr’à u populu.
Un voddu sminticà chi a Francia ha sempri dittu di u corsu – si senti sempri oghji – ch’iddu hè banditu, assassinu e tranchju…
Po dassi chi u muvimenti nazziunali, in a so logica d’andatura stituziunali pà una suluzioni pulitica d’appaciamentu, ha lacatu i tarreni culturali, ecunomichi e suciali induva ghjustamenti, ci vuliani contra – puteri strutturati e pupulari. Hè vera dinò chi u Muvimentu Naziunali ha datu monda di a so energia, di i so miltenti, ancu à u prezzu di a so vita, contr’a a riprissioni francesa.
Ma lizioni d’altrò, un ni ricevu micca. Né da un intuntitu razzistu comu Barbier. Né da un insidiosu scrivanu cume Follerou… Di sassi e di prantinzioni ugnunu si ni po carcà…
A Corsica si farà da par idda. E sulamenti da par idda. Comu l’avvia custruitu a u so tempu u Babbu di a Patria, Pasquali di Paoli, fendu di a Corsica a Nazioni incù una dimucrazia asempiara pà l’epica.
Ulivieru Sauli
suite et source de l’article
Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]Vous aimez cet article ? Faîtes-en profiter vos amis !