#corse Thiriez è a Corsica : un « amicu » di trent’anni… #Corsica

13 Mai 2013

Corsica Infurmazione - #corse Thiriez è a Corsica : un " amicu " di trent'anni... #Corsica

Oghje, Frédéric Thiriez, u mustacciutu u più odiatu di Corsica ghjè in Bastia. Incuntrarà u prifettu di Corsica, ma dinù Emile Zuccarelli, Paul Giacobbi è Pierre-Marie Geronimi.
Tutt’ognunu cunnosce a so rabbia accanita contru à u Sporting ma, di e volte, c’hè da dumandassi chì ne sò e ragioni. U fattu chì Bastia ùn intrissi micca ind’è u guadru lisciu lisciu di u futbolmudernu ? Pò esse. Ma sarà solu quessa ?
Ci pare à noi chì, malgradu e so dichjarazioni cuntrarie, Thiriez scimisce di pettu à tuttu ciò ghjè stampatu di una testa mora. Quand’ellu si feghja u passatu di l’omu, si capisce chì per stu fattu Thiriez ghjè statu furmatu à l’alte scole.
Nanzu di ghjunghje nantu à u tardi à u mondu di u ballò, st’anzianu elevu di l’ENA hà fattu una carriera ind’è l’amministrazione. Ghjè cusì chì da l’82 à l’84 Frédéric Thiriez ghjè dirittore di cabbinettu d’un certu Joseph Franceschi.
1982 : Hè finitu u tempu di a suppressione di a Cour de Sûreté de l’Etat, di l’amnistia è di u statutu particulare. U 19 d’agostu, à a vigilia di l’elezzione di u prima prisidente di l’Assemblea di Corsica, Prosparu Alfonsi, u Fronte urganizeghja a più grossa notte turchina di a so storia : Un centu di pacchetti. Libé intuleghja “Prosper Yop là boum !”. U FLN hà rottu a so treva : stima u nivellu di e riforme troppu bassu. Tandu, a Mitterrandia li dichjara a guerra. Franceschi ghjè numinatu sicritariu di statu à a sicurità publica, hà in carica l’ « antitarrurisimu ».
A so pulitica si scrive in u cuntestu torbidu di a prisidenza di Mitterrand. L’affare di l’Irlandesi di Vincennes, l’ascolte illegale, a“guerra brutta” ind’è a quale i so sirvizii sò stati impignati cù a pulizza spagnola contru à u muvimentu bascu per via di u GAL…
In quantu à a Corsica, Franceschi, u patrone di Thiriez, ghjè messu in causa ind’è l’affare di l’assassiniu di Guidu Orsoni. Qualchì tempu nanzu Paris-Match scrivia : “Franceschi tombera sur le dossier corse car il a choisi la voie la plus dangereuse, jouer le milieu contre les nationalistes”. A CCN l’accusa d’avè lasciatu fà è ancu pacatu per st’affaracciu.
Franceschi ghjè dinù quellu chì ghjè andatu à circà u « Superflic » Broussard per dalli u titulu di prifettu di pulizza in Corsica in l’83. A strategia di Broussard hè semplice : pruvà di criminalizà a CCN è u Fronte, mette in ballu una ripressione accanita. CCN quant’è FLN (!) saranu sciolti in cunsigliu di i ministri. Per fatti di st’epica a Francia sarà cundannata per atti di tortura durante interrogatorii fatti da l’omi di Broussard.
Thiriez ellu ind’è st’affare ùn hè solu qualchì “gratte-papier”. Ghjè à u centru di u sistema. Omu di cunfidenza di Franceschi travaglia dinù in cullabburazione stretta cù u cummissariu Broussard è Prouteau di u GIGN, quellu di l’affare Bastelica-Fesch. Per parlà di a Corsica è di u restu sti trè sò in cuntattu permanente. À un’epica Thiriez urganizava cun elli una riunione tutte e mane.
Ma à Thiriez, li piace ancu à fà l’heures sup’. A dice à un ghjurnalistu di Le Monde : « Quand j’étais directeur à la police, j’aimais sortir la nuit, aller « planquer ». Je me souviens d’une filature avec le commissaire Broussard, avec un « sous-marin » et quarante voitures.Mieux que dans les films ! ».
Oghje quella adrenalina, Thiriez ùn l’hà più. Allora l’omu si rimpatta nantu à noi astri in ricordu di e so annate binadette à mezu à e barbouzes, e pussette è e valisgie carche à solli…
NOTTE TURCHINA
by @Lazezu
Revue de Presse et suite de l’article :
Sur le Journal de la Corse, Sur Alcudina, sur Corsica Infurmazione/Unità Naziunale, sur France 3 Corse, Sur Corse Net Info (CNI), sur Corse Matin, sur Alta Frequenza, sur RCFM
Vos Réactions, vos commentaires sur Ce forum ?
Corsica Infurmazione: l’information de la Corse, des Réseaux sociaux et des Blogs politiques [Plateforme Unità Naziunale]Vous aimez cet article ? Faîtes-en profiter vos amis !

http://www.corsicainfurmazione.org/41080/corse-thiriez-e-a-corsica-un-amicu-di-trentanni-corsica/2013/

Partager cet article